♻️ COMEZA UN NOVO CURSO… E TAMÉN RECAPACICLA!

 Benvidos e benvidas a un novo curso escolar! 🎉

Comezamos con moitas ganas, ilusión e, por suposto, con moito movemento! Na área de Educación Física iniciamos unha nova unidade didáctica moi especial: RECAPACICLA. ♻️

Nesta unidade imos descubrir que moitos materiais que normalmente consideramos residuos poden ter unha segunda vida e converterse en materiais para xogar, facer deporte e pasalo ben. Porque reciclar tamén pode ser divertido! 🌍💚

Ao longo das próximas sesións empregaremos diferentes materiais reciclados:

📰 Comezaremos cos xornais, explorando todas as posibilidades que nos ofrecen para movernos, crear e xogar.

🧴 Despois chegarán os “Suaviboles”, nos que os botes de suavizante se converterán en elementos para as nosas propostas motrices.

🥛 Tamén teremos unha sesión de “Iogur-cestos”, dando unha nova vida aos recipientes dos iogures.

📦 E finalmente traballaremos con caixas, descubrindo todo o que podemos crear e facer con elas.

♻️ UNHA PEQUENA PETICIÓN ÁS FAMILIAS

Para poder realizar estas actividades necesitamos a vosa colaboración. Cada neno e nena deberá traer ao colexio:

🧴 1 bote de lixivia ou de suavizante, que sexa de boca ancha.

🥛 1 recipiente de iogur.

É moi importante que todos os recipientes estean:

✅ Completamente baleiros e moi ben limpos.

✅ Ben secos.

✅ Co nome e apelidos do alumno/a claramente marcado.

📅 Poderán traelos ao longo desta semana e da semana seguinte.

Todo este material será reutilizado nas nosas sesións de Educación Física, polo que vos agradecemos moito a colaboración. Entre todos e todas conseguiremos demostrar que aquilo que parece un residuo pode converterse nun fantástico recurso para xogar, aprender e facer actividade física. 🌱

🎨 E TEREMOS UN GRAN RETO FINAL…

A unidade didáctica rematará cun proxecto final: cada alumno e alumna terá que deseñar e elaborar o seu propio xoguete con materiais reciclados. ♻️🎨

O proxecto final terá un peso do 30 % da unidade didáctica, mentres que as sesións de carácter motriz representarán o 70 % restante.

Unha oportunidade para deixar voar a imaxinación, ser creativos e creativas e descubrir que non sempre necesitamos cousas novas para crear algo divertido.

🌍 Reciclar. Crear. Xogar. Moverse.

🚀 Comezamos RECAPACICLA!

💡 IDEAS PARA O RETO FINAL

E se necesitades un pouco de inspiración para o voso xoguete reciclado, aquí deixamos algunhas ideas para comezar...

👉 "Construímos con material reciclado – INTEF" (https://descargas.intef.es/recursos_educativos/RED_ES/01_Infantil/3/I_3_003_2025_0054/construimos_con_material_reciclado.html) 

Ideas sinxelas como coches, bolos, maracas, guitarras, robots ou xoguetes con botellas e caixas.

👉 "18 ideas de xoguetes con materiais reciclados" (https://www.conmishijos.com/actividades-para-ninos/18-ideas-de-juguetes-con-materiales-reciclados-manualidades-divertidas/)

Moitas propostas diferentes para buscar inspiración: xogos de puntería, construcións, xoguetes con cartón, botellas, tapóns, xornais...

👉 "Propostas de xogos con materiais reciclados – Fundación DFA" (https://www.fundaciondfa.es/escuela-de-familias/estrategias-de-estimulacion/propuestas-de-juegos-con-materiales-reciclados)

Ideas moi sinxelas para crear bolos, xogos con vasos de iogur, construcións con caixas e outros xogos.

👉 "Xogos con materiais reciclados" (https://www.youtube.com/watch?v=QAmKjeArXcU)

Propostas como xogos de anillas, bolos, tragabolas, xogos de destreza, labirintos e outros xoguetes.

🌟 Pero lembrade...

Estas páxinas son só para coller ideas e inspiración.

Non é necesario copiar ningún modelo. O máis importante é que cada alumno e alumna deixe voar a súa imaxinación e cree o seu propio xoguete, utilizando materiais que xa teñamos na casa.

♻️ Pensade: que podo construír con algo que normalmente tiraría ao lixo?

🎨 Imaxinade.

🔨 Construíde.

🎯 Probade.

🎲 E, sobre todo, xogade!

⚽ Pechamos os intercentros cunhas xornadas cheas de deporte e diversión

 Para rematar o programa de intercentros deste curso, celebramos dúas últimas xornadas no mes de maio, nas que participou o alumnado de 6º de Primaria.

👉 Na primeira xornada participou o 6º B, mentres que na segunda foi a quenda do 6º A, permitindo así que todo o alumnado tivese a oportunidade de vivir esta experiencia.

Durante estas xornadas, practicamos fútbol, un deporte que sempre entusiasma e no que o alumnado participa con moita ilusión, e tamén nos iniciamos no cachebol, unha modalidade deportiva alternativa de aproximación ao voleibol que resultou ser todo un éxito.

O cachebol sorprendeu moi positivamente, xa que favorece a participación de todo o alumnado, facilita o xogo en equipo e permite aprender dunha forma lúdica e accesible. Sen dúbida, converteuse nun dos deportes mellor valorados polos nenos e nenas.

Como en todas as xornadas, destacou o bo ambiente, o respecto, a deportividade e as ganas de pasalo ben, pechando así un ciclo de intercentros moi enriquecedor.

📸 Para rematar, non podía faltar a tradicional foto de grupo, recordo dunhas xornadas que, sen dúbida, quedarán na memoria de todos e todas.

🚍 Continuamos cos intercentros: visitamos outros centros

 Dentro do programa de dinamización intercentros, tamén tivemos a oportunidade de visitar outros centros educativos da contorna, vivindo así a experiencia desde o outro lado e compartindo novas xornadas de deporte e convivencia.

👉 Nunha das saídas, o día 13 de marzo, desprazámonos ao CEIP As Veigas, onde participamos en diferentes actividades deportivas como balonmán e fútbol. Foi unha xornada moi dinámica, na que o alumnado puido seguir desenvolvendo as súas habilidades e, sobre todo, gozar do deporte en equipo.

👉 Posteriormente, o 26 de marzo, visitamos o CEP Carlos Casares, onde practicamos fútbol e cachebol, un deporte alternativo de iniciación ao voleibol que resultou todo un éxito entre o alumnado.

En ambas xornadas, o ambiente foi excelente, destacando a boa convivencia, o respecto entre compañeiros e compañeiras e o espírito deportivo. Ademais, estas experiencias permitiron fortalecer as relacións entre centros e seguir fomentando valores fundamentais a través da actividade física.

Sen dúbida, saídas moi enriquecedoras nas que, ademais de practicar deporte, o alumnado tivo a oportunidade de convivir, aprender e pasalo xenial.

🏀 Primeiras xornadas de intercentros: deporte, convivencia e moita ilusión

 Os días 11 e 12 de decembro celebramos no noso centro as primeiras xornadas de intercentros deste curso, dentro do noso Proxecto Deportivo de Centro.

👉 O 11 de decembro recibimos ao alumnado do CEIP Santiago de Oliveira. Nesta xornada participou o grupo de 6ºB, que puido desfrutar dunha mañá deportiva practicando twincón, un deporte alternativo traballado previamente nas clases de Educación Física, e tamén baloncesto.

👉 O 12 de decembro foi a quenda do CEIP Infante Felipe de Borbón (Salvaterra), coa participación do alumnado de 6ºA. Nesta ocasión, as modalidades practicadas foron baloncesto e floorball, outro deporte alternativo que resultou moi motivador para o alumnado.

Ambas xornadas transcorreron nun ambiente moi positivo, favorecido tamén polo bo tempo, o que permitiu gozar plenamente das actividades. O alumnado participou con moita implicación, respecto e deportividade, compartindo experiencias co alumnado doutros centros.

Para rematar, realizamos unha foto conxunta na entrada do centro e compartimos un pequeno momento de merenda e recreo, que serviu para seguir fortalecendo a convivencia e as relacións entre todos e todas.

Sen dúbida, dúas xornadas moi enriquecedoras nas que o deporte foi o mellor vehículo para aprender, convivir e pasalo ben.

CAMPEONATO ESCOLAR ZONAL DE CAMPO A TRAVÉS 2025

 Como ven sendo de costume dende ADECONPAR organizouse o Campeonato Escolar Zonal de Campo a Través, que se levou a cabo en dúas xornadas. O xoves 16 de Outubro e o venres 17 de outubro.

O noso cole, o CEIP MESTRE RAMIRO SABELL participou o xoves 16 cos nenos e nenas de 4º en categoría alevín e o venres 17 cos nenos e nenas de 6º en categoría infantil.

Foi unha xornada festiva na que o deporte foi a escusa para pasar un día diferente, e desfrutar do deporte. Tras a carreira todos e todas desfrutamos dun merecido chocolate con rosquillas e unha botelliña de auga. 

Hai que felicitar a todos o alumnado pola súa participación e esforzo pero non nos imos esquecer citar a aqueles compañeiros que acadaron medalla na súa participación.

Deste xeito, na categoría alevín feminino Uxía López acadou un 3º posto e Iris González un 8º posto.

En alevín masculino Alén Pérez cun
3º posto, Pablo Codesa cun 7º posto e Pablo Román e Uriel Estévez cun 9º posto foron os premiados.

En infantil femenino valorar a 2ª posición de Sheila Müller e a 8ª de Daniela Sabas.

E en infantil masculino os alumnos de 6º ocuparon o pódium co 1º, 2º e 3º posto deste xeito Héctor Gómez, Delio Rodríguez e Mateo Gregores foron os galardonados, sen esquecernos tamén do 9º posto de Unai Pérez e o 10º de Pablo X. Martínez.

Tamén como non citar as medallas ó mérito e os forzo a:

Diego Domínguez de 4º e Miguel Represas e Izan Rodríguez de 6º.

A continuación deixamos unhas imaxes das dúas xornadas.

SAÍDA DE XOGOS POPULARES NA CANUDA

 O xoves 22 e o venres 23 de maio os alumnos de 4º e 6º respectivamente acudiron ó parque da Canuda onde realizaron multitude de xogos populares, compartindo espacio e xogos cos outros coles de ADECOMPAR. Foi unha xornada moi diverrida, na que andivemos en zancos, xogamos as ferraduras, a petanca, a chave, o xogo do limón, os arrastramortos, a sementeira, cos aros, cos cazos, ós aneis...

Deixámosvos un vídeo con algunha das fotos da xornada.

VISITANOS APAMP

O martes 6 de maio recibimos a visita de APAMP, a Asociación de Familias de Persoas con Parálise Cerebral que se atopa en Vigo.  

          Tratouse dunha visita moi interesante, de cara a poder vivenciar a diversidade funcional de moitas           persoas que son afectadas de parálise cerebral.